Zum erstä Mal het ds Cherzezieh i dr Alperueh stattgfundä. Si hei extra für üs ä Abou gmacht, dass mir ä eigete Ruum hei gha u am Schärmä u ar Wermi si gsi. Äs si viel Lüt cho, nid o ds letscht drum, wills lenger nümme het chönnä stattfindä. Zytäwis isches rächt äng gsi, emu a denä Tagä wo d Alperueh het Usstellig gha. O vo Site vor Alperueh hei si Fröid gha u mir machäs o im nächstä Jahr umä dert.

Am Höck hei mir üs vor Ruth u vor Claudia nach zwölf Jahr verabschiedet. Nöi hei mir d Linda u d Franziska begrüesst.

Am Wiehnachtsmärit hets huffä Lüt gha u d Güetzi u d Brätzeli hei Abnähmer gfundä.

Afangs Jahr hei mir für näs Projekt für Früehgeborni zirka 200 Stoffhärzli gnäiht u uf Bärn i ds Chinderspital gschickt.

D Schilehrer Daniel u Beat si mit Personä vor Alperueh gah schifahrä u mir hei d Chöste übernoh. Diä Personä wo hei dörfä gah heis sehr gnosse.

Di ersti Sitzig hei mir dieses Jahr im Februar gha u si so voll motiviert mit dä Nöie gstartet.

Am Amtsträffe si mir ir Louene verwöhnt worde. Äs isch ä gmüetliche Abä gsi u dr Ustusch mit andernä Vorstandsfroue isch geng intressant u o ds lache gits geng öppis.

Am Osterfest ds Saane hei äs paar Froue mit dä Chind 140 Osternästli verziert. Am Ostermärit u am Summerfest ghörä mir mitäm Bastle für d Chind derzue.  Das Agebot wird gschetzt u o rege brucht.

Für d Kursusstellig isch ds Wätter fasch ds schön gsi. Aber die wo si cho, si mit wunderschön usgstelltä Kursobjekt u Vorschläg für nöii Kürs belohnt wordä. D Chüeche si de bis am Abe glich o verchouft gsi.

D Versammligä vom kantonale Zämeschluss u vom schwizerische Froueverein hei mir das Jahr usseglah u d Mai Sitzig o grad, will mir nüt hei gha zum Diskutierä, emel nüt wichtigs.

Ds Summerfest ds Saane isch guet bsuecht gsi, aber äs het o scho meh Lüt gha. Äs si ca. 80 Laternli bastlet worde.

D Alpsitzig hei mir im Zytbödeli im Abländsche düregfüehrt. Si ghöre schliesslich o zum Saaneland u bi dä Geburtstagsbsüech merkäni albe, dass d Abländschner gärn vergässe göh.

Üsäs Reisli het üs i ds Ämmital gfüehrt. Mir si i Truebschachä i d Erläbnistöpferei u när no zu dä Kambly. Äs isch äs gmüetlechs Reisli gsi u aui heis gnossä.

A dr Gstaad Züglete hets bi schönem Wätter viel Lüt gha u d Öpfelchüechli u d Brätzeli si zu de Lüt cho.

Am Träffe für di ehamalige u aktive Vorstandsmitglieder hets ä intressanti Füehrig im Chinderhuus Ebnit mitämne feine Zvieri gäh. Für ds 2025 sueche mir da no öpper, wos würd organisierä. Vilich isch öpper under öich, wo das gärn würd mache?

Nid vor langem het o d Gstaadermess stattgfundä. Ä Stand voll mit feine Bachware u arä schöne Tombola hei d Lüt erwartet. Am Afang het mä ds Gfüehl, wär äch all di Chüeche wöll choufä u ässe. Aber bis am Schluss isch de nümme viu übrigbliebä. Brätzeli hets no gha u di hei mir dörfä i d Brocki gäh zum Verchoufä.

Äs isch huffe bachä wordä i däm Vereinsjahr: 210 Seckli Güetzi, knapp 100 Brot u Züpfene, us 11kg Mähl Graswürm, zirka 200 Seckli Brätzeli ohni d Broccante, um di 50 Seckli Krachmandle u Nidletäfeli, 60 beleiti Brötli, zirka 114 Torte u Cake, vilich no meh u no Muffins derzu. I danke allne ganz härzlich, wo für üs bachet hei.

O Soforthilf hei mir i däm Jahr gleistet u zwar ganzi vier Mal, unklompiziert u schnäll.

U äs si ganz viel Geburtstagsbsüech gmacht wordä.

 

I gspürä geng ume, wi gross dass d Wärtschetzig gägänüber am Frouäverein isch u so lang mir diä hei, machts o Fröid fürä Frouäverein ds schaffä. U di Wertschetzig u ä grosse Dank wetti o a öich witergäh

Wertschätzung ist eine der schönsten Formen der Anerkennung.

                                                                                                                                                                         Andrea Maurer